filma.truk

Argiaren aukerak eta ahalmenak aztertuko ditugu, pantaila tradizionalaren mugak gainditzen dituzten esperientzia zinematografiko eta ikus-entzunezkoak sortzeko.

Zinema esperimentaleko tailer honek zinema hedatuaren kontzeptura hurbilketa praktikoa proposatzen du, proiekzioa eta ikus-entzunezko esperientzia pantailatik harago ulertuz. Irudi mugikorrekin, argiarekin, soinuarekin, itzalekin, materialekin eta proiekzio-azalerekin lan egingo dugu, zinema-hizkuntza sortzeko eta bizitzeko modu berriak ikertzeko.

Tailerrean zehar mekanismo eta gailu elektroniko txikiak eraikiko ditugu, material ikus-entzunezko analogiko eta digitalak manipulatu eta konbinatzeko. Proiektoreekin, argi-iturriekin, gardentasunekin, iragazkiekin, objektuekin, sentsoreekin eta bestelako elementuekin esperimentatuko dugu, espazioan irudiak, islak, itzalak eta konposizio ikus-entzunezkoak sortzeko.

Helburua ez da soilik irudiak sortzea, baizik eta esperientzia zinematografiko bat posible egiten duten baldintzak ikertzea: proiektatzen den argia, hura jasotzen duen espazioa, mugimendua, soinua, ikuslearen presentzia eta ausazkotasuna.

Ariketa praktikoen eta esperimentazio kolektiboaren bidez, irudiak pantailatik nola ihes egin, zatitu, eraldatu eta espazioarekin harremanetan jar daitezkeen ikertuko dugu. Prozesu horretan, instalazio eta gailu ikus-entzunezko txikiak sortuko ditugu.